Corylus avellana

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Avellanera

Corylus avellana

Clasificación scientifica

Dominio:	Eukaryota
Reino:	Plantae
División:	Magnoliophyta
Clase:	Magnoliopsida
Orden:	Fagales
Familia:	Betulaceae
Chenero:	Corylus
Especie:	C. avellana

Nomenclatura binominal

Corylus avellana

L., 1758

L'avellanera,^[1] u mas correctament avellanera d'Europa occidental (Corylus avellana L., 1758), ye un arbusto de grans dimensions (bien pocas vegadas s'apresenta como árbol) de fuella caduca, natural d'Europa. Ye una d'as pocas especies agricolas que tamién se pueden trobar en estato silvestre (que ixo ye no asilvestradas) en as nuestras latituz, fendo casa suya d'os puestos humidos y pocins en os monts d'a Peninsula, y tamién con d'especial abundancia en as valles d'o Pireneu axial. En cautivo, s'ha de criar en regano.

En plega d'alto ta's 8 metros, anque en condicions particulars en hai conoixitos que n'han plegato ta's 15. A madera ye dura, flexible y resistent, y nantes se feba marchar a saber-lo ta fer-ne astils t'as ferramientas de labor, baranas y cerca t'as puertas. As fuellas redondadas, d'entre 6 y 12 cm de lonchitut y d'amplura y con d'os cantos asarratos, son tovas y s'emplegan de pastura ta'l bestiar (con buena gana que les posan a las uellas y las crabas) en os lugars a on que l'árbol ye abundant.

As flors amaneixen antes que no las fuellas, de buens comienzos en a primavera, son monoicas y con d'os amentos diferenciatos por o sexo: Os masculinos de color amariella palida y d'us 5–10 cm de luengos, os femeninos muit chicoz y de poco no s'amagan de raso a dentro la capaza, nomás que les en amaneixen os estilos por alto, de numer de 1 a 3. O fruito suyo ye l'avellana, que madura 6 u 8 meses dimpués d'a florada, en grupos de 3 u 5 avellanas, cadaguna con d'una capaza (pela) particular de fuellas modificadas que les ne tapa las 3 cuatreras partes.

A producción d'avellanas en Espanya s'aconcentra mas que mas en a provincia de Tarragona, a on que tradicionalment s'heban trobato os numeros mas grans d'hectarias de regano plantadas de las ditas. A localidat tarraconense de Reus se considera lo mas important mercato d'iste producto en o mundo, anque la importación d'avellanas de Turquía, mas baratas, l'ha meso en buens apuros en as zagueras decadas. A producción d'as avellaneras d'Asturias la sigue n'importancia, con un 4 % d'a producción estatal.^[2] Espanya, que por regular yera o tercer país en producción d'avellanas dimpués de Turquía y Italia, s'ha visto superato por Estaus Unius en os anyos 90.^[3]

O nombre de l'avellana viene d'o latín avellanam nucem, que significa "nuez d'Avella", ixo ye una comuna d'a rechión italiana de Campania.^[4]

Referencias

↑ (es) Rafel Vidaller Tricas: Nuestros árboles, Cuadernos altoaragoneses de trabajo 2, Instituto de Estudios Altoaragoneses, 1993, ISBN 84-398-7906-7, p. 2
↑ Entrada "Avellano", Nueva Enciclopedia Larousse, TOMO II, p. 870. Ed. Planeta; ISBN 84-320-4260-5
↑ Sobre o caultivo de l'avellana en Infoagro.com referents a l'anyada d'o 2001, Apto. "Importancia Económica y Distribución Geográfica", consultato o 9 de chinero de 2008.
↑ Entrada "Avellana", Nueva Enciclopedia Larousse, TOMO II, p. 869. Ed. Planeta; ISBN 84-320-4260-5